ققنوسون محفلي

هري دئدي: " آخي نييه؟ او نييه بوبئله سفئه دير؟ اگر دامبلدور..."
آقاي ويزلي يورقون سسيله دئدي: " آهان! سن مساله نين اصلي يئرينه بارماق قويدون، دامبلدور."
تانكس دئدي: " بيليسن، فاج اوندان قورخور."
هري اينانميا- اينانميا دئدي: " دامبلدوردان قورخور؟ "
آقاي ويزلي دئدي: " فاج فيكر ائدير دامبلدورون اونون ايشينده گوزي وار و ايستير سحريله جادونون وزيري اولسون..."
- " اما دامبلدور كي ايسته مير..."
آقاي ويزلي دئدي: " بلي كي ايسته مير، او هئچ وقت وزارت ايشينه گوز تيكمه ييب، اوندا كي (ميليست بگلند) بازنشسته اولدي چوخلاري دامبلدوردان اونون يئرينه اوتورماغي ايسته ديلر اما دامبلدور قبول ائتمه دي و فاج اونون يئرينه ايش اوستونه گلدي. ايندي ده فاج فيكر ائدير دامبلدوردان زرنگ ايدي كي وزيرليغا چاتيب و دامبلدوردا ايستير هرنه جور اولسا بو ايشي اونون اليندن آلسين."
هري حيرصيله دئدي: " نه جور بو فيكرلري ائدير؟ نه جور فيكر ائدير دامبلدور بو سوزلرين هامميسين اوزوندن چيخارديب؟ ياداكي من بو سوزلري اوزومدن دئييرم؟ "
سيريوس دئدي: " ولدمورتين قاييتماغين قبول ائتماقينين معني سي بودوركي وزارتين مشكلي وار، او وزارتين كي اون دورد ايل دير بئكاردير! فاج بو سوزلري قبول ائتمير و اونا راحات راق ديركي دامبلدورون يالانچي ليغين قبول ائده. "
لوپين دئدي: " وزارت قويمور بو سوزلردن اوبيرسي جادوگرلرين خبرلري اولسون، ديلي پرافت گونده ليگينده گودور! و بو باعيث اولور اگر اولوم يييه نلر ايسته سه لر ايمپريوس(1) قارقيشين ايشله دلر ايشلري راحات اولسون. "
هري ميزين داليسيندا اوتورانلارا بيربير باخا- باخا دئدي: " اما سيز كي هامميا خبر وئريسيز، هن؟ سيز دئييرسيز كي او قاييديبدير؟ "
هاميسي بير آجي لحنيله گولدولر.
سيريوس دئدي: " بلي، هاممي منيم بيردلي قاتيل اولماغيمي بيلير و وزارتده منيم باشيما مين گاليون جايزه قويوبدور. من كي ائده بيلمه رم توشه م خياوانا و ميللته ديييه م ولدمورت قاييديبدير. هن؟ "
لوپين دئدي: " منده كي ميللتين سويمه لي آداملاريندان دئييلم! بو قوردلوق ايشينين اثرلريندن دير! "
سيريوس دئدي: " تانكس ايله آرتوردا اگر آغيزلارين آچسالار وزارتخاناداكي ايشلرين الدن وئره جكلر... اولارين وزارتخانادا اولماغي بيزه چوخ فايداليدير. ولدمورتون وزارتخانادا جاسوسي اولماغي اوستونده من شرط باغليرام! "
آقاي ويزلي دئدي: " اما گئنه ائده بيلديك ايكي نفري محفلين عضوي ائده ك، بيري تانكس دير. او هله جواندير وگئچن يولدا محفلين عضوي دئييلدير. ييغينجاقيميزدا بير آئورورون اولماغي چوخ ياخچي دير. كينگزلي شكل بت ده بيزه چوخ فايداليدير، او سيريوسون توتماغينين مسئوليدير و وزارته يالاندان اطلاع وئريب سيريوس تبتده دير! "
هري دئدي: " اما اگر بو خبر ياييلماسا... "
سيريوس دئدي: " كيم دئيير بيز بوخبري يايميريق؟ به فيكر ائديسن نييه دامبلدور بو دردسره توشوب؟ "
هري دئدي: " منظورون نه دير؟ "
لوپين دئدي: " اولار ايستيرلر دامبلدوري پيسله سينلر، گورمه دين گئچه ن هفته كي ديلي پرافت نمه نه يازميشدي؟ اولار گزارش وئريبلر دامبلدورون قوجالماقينه گورا مييللتلر آراسيندا اولان جادوگرليق كنفرانسينين باشچيليغيندان گوتورولوب، اما بوجور دئييل، بو وزارتين جادوگرلريديركي بو تصميمي توتوبلار. اولاردامبلدورون درجه سين ويزنگامتدا اولان بويوك جادوگرلرين سمتيندن و جادوگرليق دادگاهيندان يئنديريبلر و ايندي ده ايستيرلر اوني مرلين محفلينين عضوليغيندان چيخاتسينلار. "
بيل گوله گوله دئدي: " اما دامبلدور دئيير اوواقتاجان كي اونون عكسلرين قورباغا شوكولاتلارين كارتلاريندان گوتورمويوبلر اصلا بو سوزلره اهميت وئرمييه جك."
آقاي ويزلي دئدي: " بو بير گولمه لي سوز دئييل، اگر او وزارتخاناايله مبارزه سينه بئلنچي دوام وئره، امكاني وار آزكاباندان باش چيخاردا! وبو لاپ ائله ولدمورت ايسته ين ايشدير. اوواقتاجان كي دامبلدور وار ولدمورت هئچ ايش گوره بيلمه ز. "
هري اومودسوز حاليله دئدي: " اما اگر ولدمورت ايسته سه گئنه اولوم يييه ن استخدام ائتسين، گره ك دييه كي قاييديبدير، بيه يوخ؟ "
سيريوس دئدي: " هري، ولدمورت گئديب هامينين قاپيسين دويمور كي من قاييتميشام! او يالان دئيير، باشا بورك قويور، جادو ائدير و... او گيزلين ايشلرده چوخ تجربه ليدير، اونون آيري نقشه لري ده وار، وايندي ده اونقشه لرين اوستونده ايشلير."
هري دئدي: " او سربازدان باشقا نه ايستير؟ "
سيريوس ايله لوپين تئز بيربيرلرينه باخديلار وهريده بو باخيشي گوردي.
- " بير شئيلر كي فقط گيزلين ايشلريله اولارا ال چاتا بيلر."
اما هري هله گيج ايدي و باشا توشموردي، سيريوس دئدي: " بير سلاح كيمين بير شئي، ائله بير شئي كي گئچن يول اونا ال تاپانمادي."
- " اوندا كي گوجلو ايدي؟ "
- " بلي. "
- " مثلآ نه جور اسلحه؟ آوادا كداورا(2) دان دا پيس راق؟ "
خانم ويزلي قاپينين داليندان قيشقيردي: " داها بسدي." هري اونون گلماغيني گورمه ميشدي. خانم ويزلي چوخ حيرصلي ايدي.
- " كئدين اوتاغيزا، هامميز." وفرد، جرج وهرمايوني يه باخدي.
فرد دئدي: " سيز بيزه دستور وئره نمز سيز..."
خانم ويزلي سيريوسا باخيب دئدي: " سن هري يه چوخ اطلاعات وئردين، بوندان چوخ دئسن گره ك آپاراسان محفلين اورتاسينا! "
هري دئدي: " به هن! منده ايستيرم عضو اولام، منده ايستيرم مبارزه ائده م."
لوپين خانم ويزلي نين يئرينه جواب وئردي: " محفلده فقط بويوك جادوگرلر عضو اولا بيلر." لوپين قويمادي فردايله جرج آغيزلارين آچالار و آرتيردي: " او جادوگرلر كي مدرسه لرين قورتاريبلار، بو ايش چوخ خطرلري وار كي سيز بيلميرسيز. سيريوس حق مالي ايلن دير، بيز دئمه لي لري هري يه دئديك. "
سيريوس چيگنين آتدي اما بير سوز دئمه دي. خانم ويزلي اوشاقلارين و هرمايوني ني قالخيزدي وهريده گوردي كي داها بير ايش گورنمز توشدي اولارين داليسينا.

____________________________________________________________________________

1) بير قارقيش كي باعيث اولور قارقيش اولان قارقيش ائدن دييه ن ايشلري گورسون.
2) اولوم قارقيشي- بو قارقيش ايشلننده بير كور ائدن ياشيل ايشيق دوزه لر و قارقيش اولاني اولدورر. اولنين بدنينده بير گورسنن اثر قويماز.

______________________________________________________________________________________
مترجيم!: مهدي واحد
E-mail: mehdi_vahed2002@yahoo.com



يازيليب بو ساحات دا3:13 PM Yalqizتوسط ايله