ققنوسون محفلي

من فيكر ائديرم گره ك هري نين اجازه سي اولا اوز نظرلريني بو موردده دييه، او ايندي اوزونه تصميم توتا بيله ر."
هري تئز دئدي: " من ايستيرم بيله م نه ايشلر اولوب."
او خانم ويزلينين اوزونه باخمادي، بوكي خانم ويزلي هري ني اوز اوغلي كيمي بيليري هري يه چوخ اثر قويموشدي اما داها اونون رفتاريندان يورولموشدي، حق سيريوسونانيدي، هري داها اوشاق دئييلدي."
خانم ويزلي دئدي: " جيني، رون، هرمايوني، جرج و فرد آشپزخانادان چيخين! "
بيردن هاي قوپدي!
جرج ايله فرد قيشقيرديلار: " بيز قانوني سنه يئتيشميشيق."
رون دئييردي: " اگر هري نين اجازه سي وار بيزيم ده گره ك اولسون."
جيني دئييردي: " مامان، منده ايستيرم ائشيده م."
خانم ويزلي دوردي اياق اوستونه و دئدي: " يوخ، من اجازه وئرميره م."
آقاي ويزلي كي بوهاي هويدان يورولموشدي دئدي: " مالي، سن فرديله جرجون قاباقين آلانمازسان، اولار قانوني سنه يئتيشيبلر."
- " اولار هله مدرسه اوشاغيديلار."
آقاي ويزلي جواب وئردي: " اما اولار ايندي بويوك بير آدام حساب اولورلار."
خانم ويزلينين اوزي قيزارميشدي وناراحات ايدي اما دئدي: " ياخچي، فرديله جرج قالا بيلرلر، اما رون... "
رون آناسينين سوزون كسيب دئدي: " اولسون، هرحالدا هري نمه نه ائشيتسه بيزه دييه جك." وشكيله باخدي هري نين گوزلرينه ودئدي: " بيه يوخ هري؟ "
بير لحظه هري ايستيردي دئسين هئچ كسه هئچ سوز دئمييه جك، قوي آزجادا اولار بئخبرليغين دادين آلسينلار! اما اولارا باخاندا بو سوزلر ياديندان چيخدي و دئدي: " بلي كي دييه رم."
رونيله هرمايوني گولدولر!
خانم ويزلي قيشقيردي: " ياخچي! ياخچي! جيني! اوتاغيوا! "
جيني غرولدايا غرولدايا گئتدي و سيريوس دئدي: " ياخچي، هري نمه نه ايستيرسن بيله سن؟ "
هري درين بير نفس چكيب دئدي: " ولدمورت هاردادي؟ نه ايش گورور؟ من موگللرين خبرلرينه قولاق آسميشام ، اما اونون ايشلرينه اوخشار بير ايش گورمه ميشم."
سيريوس دئدي: " علتي بودوركي هله عجيب بير اولوم اولماييبدير. البته اوراجان كي بيز بيليريك وبيزده چوخ شئيلر بيليريك."
لوپين دئدي: " او فيكر ائتديغيندان چوخ بيليريك."
هري دئدي: " نه جور اولوبدير كي هئچ كسي الولدورمويوبدير؟ "
سيريوس دئدي: " او ايسته ميري اونا توجه اولونسون، قاييتماغي اوجوركي ايستيردي اولمادي، او ايشلري كورلاييب."
لوپين گولدي ودئدي: " البته اونون ايشلريني سن كورلاييبسان."
هري تعجب ايله دئدي: " نئجه؟ "
سيريوس دئدي: " آخي قرار دئييلدي سن اوردان ديري قورتولاسان وقرار دئييلدي اولوم ييه نلريندن باشقا بيركس اونون قاييتماغيندان خبري اولسون، اما سن اونون اليندن قورتولدون و بيزه خبر وئردين."
لوپين دئدي: " او ايسته ميردي دامبلدور آماده له شه، اما ايندي دامبلدور اوندان قارشيلاشماقا حاضيردي."
هري سوروشدي: " بو بيزه نه كومك ائدير؟ "
بيل اينانمييا- اينانمييا دئدي: " شوخلوق ائديرسن؟ آدين آپارما ايندييه جان فقط دامبلدوردان قورخوبدير."
سيريوس دئدي: " سنين كومكين باعث اولدي دامبلدور بيرساعاتدا ققنوس محفلين گئنه يولا سالا."
هري اولارا باخا- باخا دئدي: " محفل اينديه جان نه ايشلر گوروب؟ "
سيريوس دئدي: " بيز ولدمورتون نقشه لرينين قاباقيني آليريق."
هري تئز سوروشدي: " هاردان بيليرسيز اونون نقشه لري نمه نه دير؟ "
لوپين دئدي: " دامبلدور حدس ويرميشدي، اونون حدسلري دوز چيخار."
- " ياخچي، دامبلدورون حدسي نمه نه ايدي؟ "
سيريوس دئدي: " بيرينجي باشدا او ايستيردي ارتشين گئنه ايشه سالا، اونون افرادي چوخدير، او ساحره لرو جادوگرلر كي يا اولاري مجبور ائديب ويادا جادو ائديب كي اونون ارتشينه قوشولسونلار، وفالي اولوم يييه نلري و بير بويوك ييغينجاق قارا ياراتميشلاردان، ائشيتمييبسن او ايستيري غوللاري دا اوزيله يولداش ائتسين؟ اوكي بير اووج اولوم يييه ن ايله ائده بيلمز وزارتي آلسين."
- " پس سيز قويمورسوز اونون سربازلاري چوخالسين، هن؟ "
لوپين دئدي: " بلي، بيز بو يولدا آخير حدده جان چاليشيريق."
- " نه جور؟ "
بيل دئدي: " بيرينجي ايش بودوركي آدين آپارمانين قاييتماقيندان ملتي مطمئن ائده ك و اولاري آماده ساخليياق كي چوخ چتين ايشدير."
- " نييه؟ "
تانكس دئدي: " وزارتين رفتاريندان اوتور، سن كورنليوس فاجي(1) آدين آپارمانين قاييتماقيندان سونرا گوروبسن هري؟ اونون نظري بير ذره عوض اولماييبدير و هر نمه نه ني دانير."

_____________________________________________________________________________
كورنليوس فاج: سحريله جادو وزيري
______________________________________________________________________________________

مترجيم! : مهدي واحد
E-mail: mehdi_vahed2002@yahoo.com


يازيليب بو ساحات دا11:05 AM Yalqizتوسط ايله