ققنوسون محفلي

موندانگوس سوروشدي: " اووقتدن قوجا فيگي ني گوروبسن؟ "
هري دئدي: " من هئچ كسي گورمه ميشم."
موندانگوس يالوارماق حالتيله دئدي: " من ايسته ميرديم سني تك قويام اما ياخچي بير موقعيت قاباقا گلميشدي..."
هري احساس ائديردي بالاجا بير شئي اوزون اونون اياقلارينا سورتورو تئز يئريندن آتيلدي و گوردي هرميونينين بالاجا پيشيكي ((ايري اياق)) ديركي هري ني گورماقدان سويونوردي وبو يوليله سويوندوقون گورسديردي.
سيريوس دئدي: " بوراجان ياخچي ياييدي؟ "
هري جواب وئردي: " يوخ، چوخ سفئه ايدي."
سيريوس گولومسوندي ودئدي: " من كي بيلميره م سن نه دن گيلئي لي سن."
هري اينانميا اينانميا دئدي: " نمه نه؟ "
_" منليك اولسايدي دلي الي ينلرين حمله سيندن سويونرديم، روحون اوستونده مبارزه ائتمك آدامي كسالتدن قورتارار. سن فيكرائديسن سنه پيس گونلر گئچيب، اما لاپ آزي سن ائليه بيليردين ائشيه ده قدم ويراسان، اياقلاريوي اوزالداسان ونئچه دانا داعوادا سالاسان! اما من بير آيدير كي بوردا دوستاقام."
هري قاش قاباقيله سوروشدي: " نيه؟ "
_ " چون سحريله جادو ويزارتي منيم سوراغيمداديرو ولدمورت دا اينديه جان بيليب كي من جانورنما يام، قويروقي ان سيز حتما ايندييه جان اونا دئيب. پس داها قيافه دييشماق منيم درديمه ديمز، اليمدن ده بيرايش گلمير، آزي دامبلدور كي بئله فيكر ائدير."
هري سيريوسون لحنيندن باشا توشدي او دامبلدوردان ائله راضي دئييل. بيردن هري نين آدلانميش آتاسينا محبتي گلدي و اومودلي سسيله دئدي: " ياخچي، اما هر زاددان كي خبرين وارايدي."
سيريوس كنايه ايله دئدي: " بلي، اسنيپ ين گزاريشلرينه قولاق آسماق، و اونون كنايه لرين كي جانين ائشيه ده خطره سالير ومنده بوردا راحات ياتيب ويئييرمي ائشيتماق، ويا بوكي مندن سوروشور تميز ائتمك ايشي هاراچاتيب و... "
هري سوروشدي: " نه تميز ائتمه ك؟ "
سيريوس اليله آشپزخانايا اشاره ائديب ودئدي: " بيز چاليشيرديق بوراني آدام اوتوران بير يئر ائده ك، اون ايلدير كي بوردابير كس ياشامييب، اووقتدن كي آنام اولوب، دئميرم اونون قوجا ائو جيننين حساب ائده سن كي اودا سفئه لييبدير وداها بير ايش گورمور."
موندانگوس كي نظره گلميردي اولارين دانيشيغينا توجه ائتسين دقتيله بيربوش جاما باخيردي وسوروشدي: " يولداش، بو خاليص گوموشدي؟ "
سيريوس جامي الينه آليب دئدي: " بلي، اون بئشينجي قرنين لاپ مرغوب گوموشي كي گابلين(1) لرين اليله قاليبي توكولوب وبلك خانواده سينين علامتي اوستونده يازيليب."
موندانگوس دوداقينين آلتيندا دئدي: " پئه..."
خانم ويزلي قيشقيردي: " فرد!جرج! يوخ! اليزده گتيرين..."
هري، سيريوس وموندانگوس دوروبرلرينه باخديلار وبير ثانيه نين عرضينده ميزين يانيندان اوزلرين اوزاقلاتديلار!
جرجيله فرد آبگوشت قازاني و بيرگويوم كره آبجوسين بير بويوك تخته نين اوستونده افسون ائتميشديلر كي هاوادا اوچوب وميزين اوستونده قونسونلار! قازان ميزين اوستونده زويدي وميزين اوباشيندا دوردي و ميزين اوستونده قارا رد سالدي. گويومده اوجا سسيله ميزين اوستونه توشدي و ايچينده كي ايشمه ليلر ميزين اوستونه توكولدي. چورگين پيچاقيدا تخته نين اوستوندن توشدي وميزه تاخيلدي!
خانم ويزلي قيشقيردي: " اللاهدان اوتور، بوايش لازم دئييلدي، داها سيزين اليزدن يورولموشام... هربالاجا ايشه مجبور دئييلسيزجادو ائده سيز..."
فرد تئز پيچاقي ميزدن چيخاتدي ودئدي: " بيز ايستيرديق وقتده صرفه جولوق ائده ك، سيريوس بيزي باغيشلا."
هريله سيريوس گولوردولر وموندانگوس دا يئريندن دوراندا بير يامان دئدي! ايري اياقدا قورخودان كشونون آلتينا گيرميشدي.
آقاي ويزلي قازاني ميزين آراسينا گتيريردي ودئدي: " اوشاقلار، آناز دوز دئير، سيز داها بويويوبسيز وانتظارلارسيزدن چوخاليب."
خانم ويزلي اوز اكيز اوشاقلاريندان آجيقلي اولدوقوني گويومي ميزه چيرپماقيله بيلينديردي و اونون بو ايشي باعث اولدي گويومون ايچينده كي كره لي آبجو گئنه ده ميزين اوستونه توكولسون. اودئدي: " قارداشلاريزين هئچ بيريسي بئله دئييلديلر، بيل لازيم بيلميردي هر قدمده غيب اولا، چارلي دا هرنمه نه ني افسون ائتميردي، پرسي..."
بيردن دوردي و آغاج كيمي قوروموش ارينه باخدي. بيل تئز دئدي: " ياخچي گلين غذا يييه ك."
____________________________________________________________________________

1) گابلين: جادويي موجودلارين بير جوره سيدير.
____________________________________________________________________________

مترجم!: مهدي واحد
E-mail:mehdi_vahed2002@yahoo.com

يازيليب بو ساحات دا1:17 PM Yalqizتوسط ايله