Yalniz

    بو وئبلاگا خوش گليب سينيز....هري پاتر وققنوسون امري دستاني نين توركجه ترجمه سي

Thursday, September 25, 2003

دوردونجي بولوم(2) گريمالدپليس

_____________________________________________________________________________________

اوعجله ايله قاييتدي.

هري توزلي راهرودان گئچدي وقاپينين ايلانا اوخشاردستگيره سين فيرلاتدي وقاپيني آچدي. بيرلحظه ايكي يوخوتختي گوزونه ديدي وسونرا بيرهيجانلي قيشقيرتي قوپدي وهرينين باخيشينين قاباقي بيرنفرين بيزبيزتوكلريله توتولدي!

هرميوني اوزون هرينين قوجاقينا آتدي واوني ائله سيخدي كي آزقاليردي هري ييخيلسين! رونون بالاجا بايقوشي "خرچال" اولارين باشي اوستونده اوجا سسينن قانادچاليردي.

_" هري! رون! هري بوردادير. گلماقيوي بيلمه ديق! حالين نه جوردي؟ ياخچيسان؟ بيزيم اليميزدن چوخ آجيقليسان؟ مطمئنم كي بيزدن حيرصليسن. بيليرم بيزيم نامه لريميز سنين درديوه ديميردي، اما اجازه ميز يوخ ايدي آيري بيرزاد يازاق. دامبلدور بيزي مجبور ائله ميشدي آند ايچاق كي سنه هئچ زاد يازمياق. اوه! سنه دئماقا چوخ سوزوموز وار ! سنده گره ك بيزه تعريف ائده سن، واي!"دلي الي ين" لر! بو سوزي ائشيده ن زماندان باشلاميشيق كيتاب اوخوماقا، كيتابلاردان بيرتبصره آختاريرديق اوزمانا كي قانوني سنيندن اشاغا جادوگرلرين زندگانليغي خطرده ديرواولار مجبورديلار جادو..."

رون دئدي:" قوي اوشاق نفس چكسين، هرميوني." و قاپيني اوتدي. نظره گليردي بوبيرآيين ايچينده نئچه سانتيمتر اوجاليبدير واونا گورا آريق گورسنيردي.

هرميوني گوله گوله هري ني اوتوردي اما بيرسوز ديينجه ن آرام بيرسس گلدي وآغ بير شئي صاندوقون اوستوندن آتيليب وهري نين چيگنينين اوستونده اوتدي.

_"هدويگ" !

قار بايقوشي اوحالدا كي هري قانادلارين ناز ائديردي محبت ايله هري نين قولاقين چكيردي!

رون دئدي:" اصلا اخلاقي ياخچي دئيلدي، سنين آخيرنامه وي گتيرنده بيزي اولونجه ن ديمديكله دي! باخ بورا..." واشاره بارماقين كي اوستونده بير توختاميش يارا يئري وارايدي هري يه گورستدي.

هري دئدي:" اوه بلي، متاسفم اما من جواب ايستيرديم، بيليسن..."

رون دئدي:" بيزده ايستيرديق سنه جواب وئراق، هرميوني دلي اولموشدي، دئيردي اگرسني خبرسيز قويالار سن اوز اليوه بير ايش وئره جاقسان، اما دامبلدور بيزي مجبور ائتميشدي..."

_" كي آندايچه سيز منه بير شئي دئميه سيز، هن؟"

هري احساس ائديردي كي ايستير تك اولسون! بيرآييدير كي ايستيردي يولداشلارين گورسون اما ايندي كي اولاري گورور ناراحات ايدي.

هئچ كس دينميردي، هري هدويگين قانادلارين ناز ائديردي. هرميوني قيريخ قيريخ دئدي:" دامبلدور فيكرائديردي لاپ ياخچي راق ايش بودير."

هري دئدي:"هن!" هرميونينين ده بارماقلاريندا هدويگين ديمديگينين يئرين گوردي اما سايمادي.

رون دئدي:" او فيكر ائديردي سنين يئرين ((موگل)) لرين يانيندا امن..."

هري قاشلارين قوزاييب دئدي:" پئه! سيزين هانسيزا يايدا دلي الي ينلر حمله ائتديلر؟ هن؟"

_ "هئچ بيريميزه، اما اوناگورا دامبلدورققنوس محفلينين عضولرينين نئچه سينه دستور وئرميشدي سني گودسونلر."

هري احساس ائله دي گويدن يئره توشوب! پس اوزوندن سونرا هاممي بيليردي كي نئچه نفر اوني گودور! اوحالدا كي ايستيردي سسين ياواش ساخلاسين دئدي:" ائله ده فايدا وئرمه دي، بيه يوخ؟ آخيرده ائله اوزوم مجبور اولدوم اوزومدن دفاع ائده م."

هرميوني دئدي:" دامبلدور چوخ ناراحات اولدي. اوندا كي ائشيتدي موندانگوس شيفتي قورتولماميشدان آيري يئره گئديب ... واي! قورخمالي ايدي."

هري كنايه ايله دئدي:" من كي سويونورم موندانگوس بو ايشي گوردي، اگر اوردا اولساايدي، من جادو ائله مزديم و دامبلدوردا يايين سونوناجان مني "پريوت درايو" دا ساخلاردي."

هرميوني آرام دئدي:" سن وزارتين جلسه سيندن نگران دئيلسن؟"

هري يالاندان دئدي:"يوخ! " واولاردان اوزاقلاشدي، هدويگ هري نين چيگنينين اوستونده دوروبره باخيردي واوز وضعيتيندن راضي ايدي! اتاغين وضعي ياخچي دئيلدي،هريئر قارانليق وشئه ايدي . هري اتاقا باخاباخا واوحالدا كي ايستيردي سسين قوزاماسين دئدي:" ياخچي، به نيه دامبلدورون اصراري وارايدي مني خبرسيز ساخلاسين؟ اوزوزه زحمت وئريبسيز بوني سوروشاسيز؟







لوگو


گجيل سايتي :نه ايستير سينيز!!!؟؟

PDF فرموندا فصيل لر:

بيرينجي فصيل

ايكينجي فصيل

اوچونجي فصيل

دوردونجي فصيل

جناب مهران بهاري دان اوز گوركم وارايش لرينه خاطير تشكر اليريك.


آرشيو