Yalniz

    بو وئبلاگا خوش گليب سينيز....هري پاتر وققنوسون امري دستاني نين توركجه ترجمه سي

Saturday, September 20, 2003

دوردونجي بولوم(1) گريمالدپليس

______________________________________________________


هري ايسته دي دئسين: "بونمه نه دير؟ ققنوسو..."

مودي دئدي:" بوردايوخ اوغلان، دوز گئداق ائوه."

كاغاذي هري نين اليندن آليب وعصانين اوجوايله يانديردي. هري دوروبرده كي ائولره باخيردي، اولارشوماره 11ائوين قاباقينداايديلر، باخدي سولا شوماره 10 ني گوردي، ساغا باخدي شوماره13 اي گوردي. دئدي: "پس شوماره..."

لوپين ياواش سسينن دئدي: "حفظ ائله ديغيوي ياديوا سال."

هري فيكرائله دي. هله يادينا دوشمه ميشدي كي بيردن بير سينيق قاپي شوماره11اينن 12نين آراسينداظاهيراولدي! وسونرا كيفيرديوارلار و باتيق پنجره لرظاهر اولدولار! ائله بيل كي بيردانا اضافه ائوي اوردا يئلينن دوزه لديبسن! هري نين آغيزي تعجبدان آچيق قالميشدي. مودي دالدان هري نين بئلينه ويريب دئدي: "تئز اول"

هري داش پله لردن چيخيب وقاپييا باخدي، لوپين عصاسين چيخاتدي وياواش قاپييا چالدي واوني آچدي دئدي:

"هري گير ايچري، اماچوخ قاباقا گئتمه، هئچ زادا دا ديمه."

هري قاپيدان قارانليق راهرويا گيردي. هريئردن شئه وكهنه ليق اييي گليردي، چوندي باخدي داليسينا وگوردي اوبيري جادوگرلرده اونون داليسيندان گليرلر. مودي پله لرين اوستونده دورموشدي و"سوندوره ن"ي گويه طرف توتموشدي، او بير وردينن بوتون ايشيقلاري كي لامپلاردان آلميشدي اوز يئرلرينه قئيتردي وگيردي ائوه وعصاسينان هري نين باشينا چيرپيب دئدي: "بودا بوندان." هري احساس ائليردي باشينا ايستي سو توكوبلر. بيليردي كي بو ايش، اوهامي آرادان آپارماق افسونون گوتوره ر.

مودي دئدي:" ياخچي، ايندي ترپشمه يين كي من بوراني ايشيقلاديم." هري اولارين بو رفتارلاريندان ناراحات اولموشدي و ياخچي احساسي يوخ ايدي. مودي كهنه گازي لامپلاري يانديردي وهري ايندي ائلييه بيلردي بو عجيب ائوي راحت گورسون.

راهرونون اوبيري طرفيندن اياق سسي گلدي و رونون آناسي ،" خانم ويزلي"، اوردا ظاهير اولدي. عجله ايله اولارين طرفينه گليب وگوله گوله دئدي:" اوه! هري، چوخ سويونورم كي سني گئنه گوروره م." و هري ني قوجاقلادي. وسونرا گئنه هري يه باخيب دئدي:" به نييه توكولوسن؟ گره ك بير شئي ده يييه سن، شاما جان گره ك دوزه سن."

وسونرا جادوگرلرين دسته سينه طرف گئتدي ودئدي: " ايندي يئتيشدي، جلسه باشلانيبدير."

جادوگرلر هيجانلي سسلر چيخاتديلارو خانم ويزلي گله ن قاپييا طرف گئتديلر. هري ده توشدي لوپين نين داليسينا، اما خانم ويزلي اوني ساخلادي... " يوخ هري، بوجلسه فقط محفلين عضولرينيندير. رونونان هرميوني اوست طبقه ده ديلر، جلسه قوتولونجان گئت اولارين يانينا ، سونرا شام يييه جاييق." و اييلدي هري نين قولاقينا دئدي:" راهرودا اولاندا ياواش دانيش."
_" نيه؟"

_ "ايسته ميرم بير زاد اويانا."

_"منظوروز...؟"

_ " سونرا توضيح وئره جاقام ، ايندي گره ك عجله ائلييه م، دوز دييم هاردا ياتاجاقسان." واو حالدا كي بارماقين دوداقلارينا فشار وئريردي هري ني ايكي دانا اوزون كهنه پرده نين يانيندان رد ائله دي وبير سايباني كي نظره گليردي كوول ده اوتوران غولون كسيلميش اياقيندان دوزه ليب دور ويرديلارو بير قارانليق پلكاندان چيخماقا باشلاديلار. مسيرين كناريندا بير رديف چوروموش باش وارايدي كي پلاك اوستونده ديوارا ياپيشميشديلار. هري دقتينن باخيب وبيلدي كي بو باشلار ائو جنلرينين باشيدير. هري هر قدم كي گوتوروردي تعجبي چوخاليردي ، اولار بو ائوده كي نظره گليردي قاراجادوگرلرين اولا نه ايش گوروردولر؟

_" خانم ويزلي، نييه...؟"

خانم ويزلي آرام سسينن دئدي:" رونونان هرميوني هر نمه نه ني سنه توضيح وئره جاقلار، منيم عجله م وار."

اولار ايكينجي طبقه يه يئتيشديلر.

_" ياخچي، ساق الده كي قاپي. جلسه قورتولاندا چاغيراجاقام."






لوگو


گجيل سايتي :نه ايستير سينيز!!!؟؟

PDF فرموندا فصيل لر:

بيرينجي فصيل

ايكينجي فصيل

اوچونجي فصيل

دوردونجي فصيل

جناب مهران بهاري دان اوز گوركم وارايش لرينه خاطير تشكر اليريك.


آرشيو