Yalniz

    بو وئبلاگا خوش گليب سينيز....هري پاتر وققنوسون امري دستاني نين توركجه ترجمه سي

Tuesday, September 09, 2003

هري نين صندوقي نئچه سانتيمتر قالخدي. تانكس بيراركستر رهبري كيمي عصاني الينده توتموشدي وصندوقي گويده ساخلاميشدي! سورا عصانين اشاره سينن اوني ائشييه آپاردي، هدويگين چپري ده سول الينده ايدي . هري ده سوپورگه سينين دسته سين گوتدي وتوشدي اونون داليسينا.

آشپزخانادا مودي گوزون اوز يئرينه قويموشدي. گوزتميزاولاندان سورا ائله يئيين فيرلانيردي كي هري اونا باخاندا باشي گيجه لدي! ((كينگزلي شكل بت)) ينن((استورجيس پادمور)) مايكروويو اجاقينا باخيرديلار. ((هستيا جونز)) بير يئرآلما سويان دستگاهينا كي كشودان تاپميشدي باخيردي وگولوردي. ((لوپين)) ده او نامه يه كي ((دورسلي)) لره يازميشدي مهر ويريردي. او هرينن تانكسي گورجاق دئدي:" ياخچي اولدي، ايندي بيردقيقه وقتيميزوار.فيكرائليرم گره ك گئداق باغا، هري من خالان واونون ارينه نامه يازديم ودئديم نگران ..."

هري دئدي:" اولارنگران اولمازلار! "

_" اولماسينلار... سنين يئرين امندي."

_ " بوكي بيله لر منيم يئريم امندي اولاري نگران ائله ر!"

_" گله ن ياي گئنه بورا قييده جاقسان ."

_" گئنه مجبورام؟ "

لوپين گولدي اماهئچ زاد دئمه دي. مودي عصاسينان اشاره ائله دي كي اونون يانينا گئتسين. حيرصينن دئدي:" اوغول گل قاباقا، گره ك سنين اوهاملاريوي آرادان آپارام."

هري ال اياقين ايتيردي ودئدي:" نه ايش گوره سن؟"

مودي كي عصاسين قوزاميشدي دئدي:" اوهامي آرادان آپارماق افسوني، لوپين دييركي سنين بير گيزلين ساخلايان شنلين وار، اما اونداكي اوچوسان شنل اوستونده قالماز، بو ياخچي ائلييه بيلر سني گيزله ده، بويور..."

مودي عصاسينان هري نين باشينا يئيين بيرضربه ويردي. هري نين عجيب احساسي واريدي، ائله بي بيريومورتا اونون باشينا چيرپيبسان! احساس ائليردي سرين دامجيلار ضربه نين يئريندن آشاغايا ساري حركت ائليللر!

تانكس هري نين قارنينا باخيب دئدي:" ايشين چوخ گوزه ليدي مد_آي."

هري اوز بدنينه _يااوشي كي قاباقجان اونون بدن ايدي_ باخيردي. ايندييه جان بدني اوجوراولماميشدي، گورسنميين دئيلدي اما دوز داليندا كي آشپزخانانين رنگين اوزونه توتموشدي! ائله نظره گليردي كي بير آدام_گون سويه ن اولوبدي!

((مودي)) كي دالي قاپينين قفلين آچيردي دئدي:" تئز اولون."

هامميسي ائشييه چيخديلار و ورنونون گوزل چمنلرينين اوستونده دوردولار.(( مودي)) كي جادو گوزوينن گويه باخيردي دئدي:" ياخچي هاوادي آزجا بولوتدا اولسايدي بونداندا ياخچي اولاردي. " سورا هري يه باخيب دئدي:" هي، سن، بيز كيپ آراييشده اوچاجاقيخ، ((تانكس)) سنين قاباقيندا اوچاجاق، سن گره ك اونون داليندا دوراسان، ((لوپين)) سنين آشاغاندا حركت ائلييه جاق، منده سنين داليندا اولاجاقام. اوبيرسيلرده بيزيم دوره ميزده اوچاجاقلار. بيزبو آرايشي قاتميياجاقيخ، بيلديز؟ اگربيزدن بيري اولسه ..."

هري نگرانليغينان سوروشدي:" بيه امكاني وار...؟"

اما مودي اونون سوزون سايمادي. " اوبيريلر اوچسونلار، دايانمايين، آراييشي بيربيرينه ويرميين، هري اگربيز هاميميز آرادان گئتديق وسن سالم قالدين، شرقه ساري مسيريوه ادامه وئر. قراوللارين ايكينجي گروهي گليب و اوزلرين سنه يئتيره للر."

((تانكس)) كي هري نين صندوقون وهدويگين چپرين سوپورگه سيندن آسيلان بيرقلابا باغليردي دئدي:" اوجورمسخره دانيشما، مومكوندي فيكر ائلييه بيز بوايشي جدي توتماميشيق."

مودي جواب وئردي: "من فقط ايستيرم نقشه لري بواوشاغا دييه م، بيزيم وظيفه ميز اوني فرماندهليق مركزينه سالم يئتيرماقدي. بيزدن اولن اولسا..."

((كينگزلي شكل بت)) آرامشلي سسينن دئدي:" قرار دئيل بيرنفر اولسون."

((لوپين)) گويه اشاره ائله دي وهيجانينان دئدي:" مينين سوپورگه لريزه، بو بيرينجي علامتيدي.". اولارين باشي اوسته اوزاق فاصله ده اولدوزلارين آراسيندا بالاجا جرقه لرگورسنيردي.

هري ده اوعلامتلري گوردي. ساغ اياقين آذرخشين اوبيرسي طرفينه قويوب و محكم دسته سيندن ياپيشدي ، نظره گليردي كي سوپورگه ده هري كيمين اوچماقا چوخ هوسلي دي!

باشقا جرقه لركي بويول ياشيل ايديلر باشلارينين اوستونده گورسننده ((لوپين)) اوجاسسينن دئدي:" ايكينجي علامت! يولا توشون."

هري اوزون يئردن قوپاتدي. گئجه نين سرين يئلي توكلرينده فيرلانيردي.((پريوت درايو)) ين گوزل باغلاري اوندان فاصله آچيرديلاروبئله نظره گليردي كي اولار تيكه تيكه يئرين اوزونه تيكيليبلر! وزارتين جلسه سينين فيكرين باشيندان آتميشدي و سويوندوقوندان اوره گي ايستيردي پاتداسين. هري گئنه اوچوردي! اوچ آييدي كي اوچماق خيالينداايدي وايندي بو خيال دوغرولاشيب.

((مودي)) هري نين داليسيندان قيشقيردي:" سول، چونون سولا، بير((موگل)) گويه باخير." تانكس چوندي سولا وهري ده داليسيجان چوندي. " گره ك اوجالاشاق، بيرفرسنگين دورددن بيريجان قالخين."

گويه قالخديقجان هري نين گوزلري سويوقدان سولانيردي. باخدي آشاغايا اما فقط ايشيق نقطه لركي ايگنه اوجو كيمين ايديلر گورسنيردي، ((دورسلي)) لر ايندي حتما ائولرينه قييديرديلر! هري اولارا فيكر ائليينده اوجا سسينن گولدي اما سسي يئلين زوزه لرينده ايتدي. او چوخ سويونوردي.

مد_آي قيشقيردي :" چونون جنوبا، يولوموزدا بيرشهر وار."

اولارمسيرلرين چويوردولر تا اوشهرين اوستوندن گئچمييه لر. مودي دئدي:" جنوب شرقين طرفينه گئدين وگئنه اوجاليغيزي چوخالدين قاباقدا بيربولوت وار كي ائلييه بيلليق اوزوموزي اونون ايچينده گيزله داق."

تانكس حيرصينن دئدي:" بولوتون ايچينه گيرمييه جاقيخ، ايسلاننيق مد_آي."

هري نين اللري آذرخشين اوستونده حس سيز اولموشدي . آرزي ائليردي بير ايستي پالتار اينينده اولايدي، سويوقدان تيتيريردي.

هردن ((مد_آي)) ين دستوروينان مسيرلرين چويوروردولر. هري نين گوزلري سرين يئلين قاباقيندا آچيلميردي. فقط بيريول سوپورگه اوستونده بو بئله اوشوموشدي و اودا ((هافلباف)) ين كوئيديچ تيمينن طوفاندا مسابقه وئرنده ايدي.

هري نين قوروقچولاري شيكاري قوشلار كيمي اونون دوروبرينده فيرلانيرديلار. هري زماني ياددان چيخاتميشدي وبيلميردي نه زماندي اوچوللار.

مودي قيشقيردي:" جنوب غربييه ساري چونون، گره ك اتوباندان اوزاق اولاق." هري كي آزقاليردي بوز باغلييا ! حسرتينن اياقينين آلتيندا كي ماشينلارا باخيردي وفيكر ائليردي ((فلو)) پودروينان گئتماق چوخ ياخچي اولاردي، دوزدي گولله لنماق وبخاري ايچينه گيرماق چتين ايش ايدي اما حداقل اورا ايستي اولاردي!

((كينگزلي شكل بت)) كي كچل باشي آي ايشيقيندا پاريلديردي هري يه طرف گلدي. ((املاين ونس)) كي هري نين ساغينداايدي يئرين ((استورجيس پادمور)) ونان دگيشدي. ((مودي)) قيشقيردي:" گره ك آزجا بوردا فيرلاناق كي مطمئن اولاق تعقيب اولماميشيق."

تانكس قاباقدان قيشقيردي:" بيه دلي اولوبسان مد_آي! بيز سوپورگه لريميزين اوستونده بوز باغليريق! اگر ايري يوللارينان گئتساق گله ن هفته يه جان يئتيشمييه جاقيخ! هئچ ائله بيريولدا قالمييب..."

((لوپين)) ين سسي گلدي كي دئدي:" هري ارتفاعيميزي آزالديريق، توش ((تانكس)) ين دالينا."

هري ((تانكس)) ين داليسيجان گئتدي. اولاربير بويوك ايشيق ييغينتيسينا طرف كي هري ايندييه جان اوجوربير شي گورمه ميشدي، گئديرديلر.

اولار آشاغا يئنديقجان هري ائلييه بيليردي ماشينلارين چيراغي، خياوانين لامپلاري و... ني گورسون. چوخ گويلي وارايدي كي تئز يئره يئتيشسينلر اما گره ك بيرنفر اوني سوپورگه دن قوپارداايدي!

تانكس قيشقيردي:" دا يئتيشديق."

نئچه ثانيه دن سورا اولار يئرده ايديلر. بالاجا بيرميدانين چمني اوستونده اوتدولاريئره. تانكس هري نين وسايلين سوپورگه سيندن آچيردي وهري باخيردي دوروبرينه. نظره گلميردي ائولر اونا خوش گليبسيز دييه لر! بعضي سينين پنجره لري سينميشدي و زيبيللر قاپيلارين قاباقيندا ييغيشيب قالميشدي.

هري سوروشدي:" بيز هارداييق؟" لوپين دئدي:" بير دقيقه دوز".

مودي شنلينين ايچين آختاريردي، اونون دا بارماقلاري سويوقدان حس سيز اولموشدي.

دوداقلارينين آلتيندا دئدي:" تاپديم" وفندك كيمين بيرشي چيخاتدي، توتدي گويه واونون دويمه سين ويردي.

اولارا ياخين اولان چيراغ سوندي. مودي گئنه اوني ايشله تدي و اوبيري چيراغدا سوندي، اوبئله اودستگاهي ايشله تدي كي ميدانين لامپلارينين هامميسي سوندي وتكجه آيين ايشيقي قالدي.

((سوندوره ن)) ي جيبينه قوياندا دئدي:" بوني دامبلدوردان بورج آلمميشام. گوروسن؟، ايندي اگر ((موگل)) لر پنجره دن ائشييه باخسالار بيرشي گورمييه جاقلار. ايندي تئز اول"

هري نين قولوندان ياپيشدي واوني خياوانا طرف چكدي و((تانكس)) ينان ((لوپين)) كي هري نين وسايلين گتيريرديلر اولارين داليسيجان گليرديلر، اوبيرسي جادوگرلرده عصالارين اللرينده ساخلاييب و اولارين يانيندا گليرديلر.

ائولرين بيريندن موسيقي سسي گليردي و زيبيللرين اييي كي اوقاپينين قاباقيندا ييغيشميشدي اولاري ناراحات ائليردي. مودي بيرتيكه دري كاغاذي هري نين اوهام سيلينن الينه وئريب دئدي:" آل. وايشيق عصاسين توتدي اورا كي هري اوني اوخوسون." تئز اوخو وياديندا ساخلا."

هري باخدي كاغاذا. اوخط نظرينه تانيش گليردي:

((ققنوس محفلينين فرماندهليق مركزي لندنين ((گريمالدپليس)) اينين شوماره 12 سينده دير.))

____________________________________________________________________________

مترجم!: مهدي واحد

E_mail: mehdi_vahed2002@yahoo.com





لوگو


گجيل سايتي :نه ايستير سينيز!!!؟؟

PDF فرموندا فصيل لر:

بيرينجي فصيل

ايكينجي فصيل

اوچونجي فصيل

دوردونجي فصيل

جناب مهران بهاري دان اوز گوركم وارايش لرينه خاطير تشكر اليريك.


آرشيو